Jólasveinninn minn

Jólasveinninn minn,  
jólasveinninn minn  
ætlar að koma í dag  
Með poka af gjöfum  
og segja sögur  
og syngja jólalag  
Það verður gaman  
þegar hann kemur  
þá svo hátíðlegt er  
Jólasveinninn minn,  
káti karlinn minn  
kemur með jólin með sér

Jólasveinninn minn,  
jólasveinninn minn  
ætlar að koma í kvöld  
Ofan af fjöllum  
með ærslum og köllum  
hann labbar um um holtin köld  
Hann er svo góður  
og blíður við börnin  
bæði fátæk og rík  
Enginn lendir í  
jólakettinum  
allir fá nýja flík

Jólasveinninn minn,  
jólasveinninn minn  
arkar um holtin köld  
Af því að litla  
jólabarnið
á afmæli í kvöld  
Ró í hjarta,  
frið og fögnuð  
flestir öðlast þá  
Jólasveinninn minn,  
komdu karlinn minn  
kætast þá börnin smá.

Saga

Það er kominn desember og jólasveinninn er að gera sig tilbúinn til að fara til byggða. Hann tekur saman pokann sinn sem er stútfullur af gjöfum fyrir börnin. Hann hlakkar svo til að hitta börnin á ýmsum jólaskemmtunum í desember og gefa þeim glaðninga, syngja með þeim og segja þeim sögur.

Jólasveinninn leggur af stað ofan af fjöllum og fer til byggða. Hann syngur hátt á meðan og öskrar hóhóhó! Það er mjög kalt úti og labbar hann um holt og hæðir til að komast til byggða. Þegar hann kemur til byggða er mjög stórt verkefni framundan.

Hann labbar á milli allra húsanna og gefur öllum börnunum í skóinn. Á meðan situr jólakötturinn heima í hellinum í fýlu því hann fær ekkert nema kattarmat.

Jólasveinninn kemur að húsi og fer inn um gluggann. Þar, sér til mikillar undrunar, sér hann að litla stelpan sem á þetta herbergi er vakandi. Hún segist ekki geta sofið og biður jólasveininn að segja sér sögu. Hann segir henni söguna af jólabarninu sem á afmæli á jólunum. Litla stelpan sofnar róleg, friðsæl og glöð. Jólasveinninn er ánægður með þessa jólanótt og hlakkar til þegar börnin vakna og gleðjast í fyrramálið.

Orðaforði og hugtök

• Ærsl = Mikil gleði með látum
• Flík = Föt
• Arka = Labba hratt/ákveðið
• Holt = Lítið fjall
• Fögnuður = Mikil gleði
• Kætast = Gleðjast

Sjónrænt

• Plaköt sem sýna lagið á sjónrænan hátt og auðvelda að útskýra lagið fyrir börnunum.
• Hægt að vera með leikmuni eins og poka með gjöfum, jólakött, jólasvein, holt og hæðir, jesúbarnið.

Hreyfing og leikur

1. Hægt að búa til holt, hæðir og hellinn sem jólasveinarnir búa í úr holukubbum. Þar er hægt að leika jólaköttinn, jólasveininn og fleiri úr grýluhelli.

2. Hægt að vera með hreyfileik ef búið er til holt og hæðir úr holukubbum, eins og einskonar þrautabraut.

3. Gjafapokaleikur: Eitt barn er jólasveinninn með pokann sinn og ofan í eru „gjafirnar“. Jólasveinninn sýnir börnunum hvað er í pokanum og svo snúa allir sér við á meðan jólasveinninn stingur einum hlut aftur ofan í pokann. Hinir eiga að giska á hvaða hlut vantar. Hægt að gera þyngra með að taka fleiri hluti heldur en einn.

Samþætting

Jólasveinar einn og átta er hægt að tengja við lagið þar sem það fjallar líka um jólasveinana að koma til byggða. Einnig hægt að tengja lagið um jólaköttinn ef börnin vilja vita meira um hann eftir að hafa sungið þetta lag.

Ýmsar bækur um jólasveinana:

• Bergljót Arnalds: Jólasveinasaga
• Iðunn Steinsdóttir og Búi Kristjánsson: Jólasveinarnir
• Brian Pilkington: Jólasveinarnir þrettán