Nú er Gunna á nýju skónum,
nú eru´að koma jól.
Siggi er á síðum buxum,
Solla´á bláum kjól.
:/: Solla´á bláum kjól :/:
Siggi er á síðum buxum,
Solla´á bláum kjól.
Mamma er enn í eldhúsinu
eitthvað að fást við mat.
Indæla steik hún er að færa
upp á stærðar fat.
Pabbi enn í ógnarbasli
á með flibbann sinn.
„Fljótur, Siggi, finndu snöggvast
flibbahnappinn minn“.
Kisu er eitthvað órótt líka,
út fer brokkandi.
Ilmurinn úr eldhúsinu
er svo lokkandi.
Á borðinu ótal bögglar standa,
- bannað að gægjast í.
Kæru vinir, óskup erfitt
er að hlýða því.
Jólatréð í stofu stendur,
stjörnuna glampar á.
Kertin standa á grænum greinum,
gul og rauð og blá.
Sagan
Jólaundirbúningurinn er í fullum gangi. Börnin hafa verið að bíða spennt
eftir aðfangadagskvöldi. Þau eru komin í sparifötin sín en því miður
byrjar veislan ekki strax. Gunna fékk nýja skó og má nú loksins vera í
þeim, hún er mjög spennt. Siggi er á fallegum síðum buxum og Solla á
bláum kjól.
Mamma er á fullu inni í eldhúsinu að undirbúa jólamatinn. Hún er búin að
steikja kjötið, tekur steikina úr ofninum og setur hana á stórt fat.
Pabbi er að klæða sig í fínu fötin sín en á erfitt með að hneppa
kraganum á skyrtunni sinni. Maturinn er að verða tilbúinn þannig að hann
er að drífa sig, en hann flýtir sér svo mikið að hann missir
flibbahnappinn úr höndunum. Pabbi sér flibbahnappinn ekki strax á
gólfinu og kallar á Sigga til að koma að hjálpa honum að finna hann.
Kisan skilur ekki neitt í þessum æsingi og lætur sig hverfa eins fljótt
og hún getur.
Mjög góður ilmur kemur úr eldhúsinu, núna er ekki langt í mat.
Á borði í stofunni eru jólapakkar. Það er freistandi að kíkja í þá og
finna út hvað er í þeim en börnin vita að þau eiga að bíða, fyrst á að
borða saman jólamat.
Jólatréð er í stofunni og ofan á því er glansandi stjarna. Jólatréð er
fallega skreytt með gulum, rauðum og bláum kertum.
Núna er allt tilbúið fyrir dásamlegt aðfangadagskvöld!
Orðaforði og hugtök
spariföt (úr sögunni)
steik
flibbi / flibbahnappur
ógnarbasli / eiga í basli með
brokkandi / að brokka
lokkandi
bögglar
Okkur finnst gaman hvað lagið er raunverulegt, það fjallar um hluti
sem flest börn eiga að þekkja eða skilja. Lagið veitir tækifæri til að
ræða ýmislegt í tengslum við jólin og veisluhöld heima hjá fólki. Hægt
er að tengja við reynslu barna og hvetja til umræðu: fáið þið ný föt
um jólin, verðið þið í sparifötum á aðfangadagskvöld? Hver eldar
jólamatinn hjá ykkur, er það mamma/pabbi/amma/afi...? Hvað er í
matinn, er steikt kjöt hjá öllum eða eitthvað annað? ...
Sjónrænt
Við prentuðum myndir til að setja á loðtöflu fyrir hvert erindi.
Önnur hugmynd er að finna búninga (hvít skyrta, sparifötin, svunta)
þannig að nokkur börn geta verið pabbinn, mamman og börnin úr laginu á
meðan við syngjum og/eða þau geta farið í hlutverkaleik eftir að við
sungum og ræddum lagið.
