Hring eftir Hring

Hring eftir hring eftir Elfu Lilju Gísladóttur er alveg bráðnauðsynleg eign fyrir sérhvern leikskóla þar sem markvisst er unnið með tónlist og hreyfingu. Bókin var gefin út í litlu upplagi, þannig að það er um að gera að hafa samband við Elfu Lilju sem fyrst og útvega sér eintak :o)

Á málþingi um tónlistarnám barna 1-6 ára í mars 2007 heyrði ég fyrst að Elfa Lilja væri að vinna að þessari bók. Það var greinilegt að Elfa vann af miklum eldmóði og innblæstri, en líka á mjög faglega traustum grundvelli, þannig að ég beið bókarinnar með mikilli eftirvæntingu. Þegar hún svo kom út snemma árs 2009 kom í ljós að hún hafði algerlega verið þess virði að bíða eftir henni :o) Þetta er frábær bók í alla staði og að mínu mati einmitt þess konar uppflettirit og hugmynda- og lagasafn sem allir, sem vinna að tónlistarstarfi í leikskóla, þurfa á að halda.

Bókin er rúmlega 200 bls. í A4-broti, í hörðu bandi. Frágangur er allur hinn snyrtilegasti, mikið af litmyndum og umbrot mjög smekklegt. Í henni eru 79 sönglög með nótum. Öll lögin er að finna á tveimur geisladiskum sem fylgja með bókinni.

Faglegur grundvöllur bókarinnar er meistaraprófsritgerð um tónlistarkennslu í leikskóla sem Elfa Lilja skrifaði við tónlistarháskólann Mozarteum í Salzburg.

Finna má dæmi um lag úr bókinni hér á Börn og tónlist. Það heitir Hunangsflugan.

Kaflarnir í bókinni

1. Velkomin! Nafna- og kveðjuleikir
2. Öndun og rödd
3. Þulur, rímur og romsur
4. Að syngja söngva
5. Líkaminn sem hljóðfæri
6. Hljóðfæri - í upphafi var tromman
7. Heimasmíðuð hljóðfæri
8. Grafísk nótnaskrift
9. Hlustun á tónlist og hreyfingu
10. Skynfæri og líkamsvitund
11. Hreyfing, leikur, samvinna
12. Hreyfingar með efnivið
13. Að dansa og dansa dansa
14. Spenna og slökun

PDF-bæklingur um bókina