Ruggutönn

Leikskólabörnin elska þetta lag! Þau koma oft til mín og segja: "Birta sjáðu, ég er með lausa tönn". "En gaman!" svara ég, og þó að ég sjái það stundum að tönnin er kannski ekki alveg jafn laus og barnið telur, þá passa ég mig á að segja: "Eigum við þá ekki að syngja lagið saman?!". Þetta tvennt helst nefnilega hönd í hönd og það er mikil tilhlökkun sem fylgir því að fá fyrstu ruggutönnina sína og auðvitað gaman þegar lagið verður sungið fyrir mann í samverustund.

Þetta er þekkt danskt barnalag eftir Povl Kjøller (Rokketand) og eitt af fyrstu lögunum sem við Baldur þýddum yfir á íslensku. Mér fannst svo gaman að komast að því að á íslensku var ekki sérstakt orð fyrir lausa tönn þannig að við Baldur völdum orðið Ruggutönn og það má segja að við höfum þar með búið til nýyrði :)

Ég er með lausa tönn
Hún ruggar geðveikt mikið
Pabbi vill toga' í mína tönn
En nei, þar dreg ég strikið!

Hún er mín eigin ruggutönn
Ruggu-ruggu-ruggu-ruggutönn
Ég vil ekki missa mína ruggutönn
Ruggu-ruggu-ruggutönn

Ég er með lausa tönn 
Hún ruggar er ég tala 
Mamma vill taka þessa tönn 
Ég neita því og gala: "Nei!"

Hún er mín eigin ruggutönn 
Ruggu-ruggu-ruggu-ruggutönn 
Ég vil ekki missa mína ruggutönn 
Ruggu-ruggu-ruggutönn

Ég er með lausa tönn 
Hún ruggar við hvern sopa 
Ég sötra saft í óða önn 
Því hún ruggar líka er ég ropa!

Ég elska mína ruggutönn
Ruggu-ruggu-ruggu-ruggutönn
Ég vil ekki missa mina ruggutönn
Ruggu-ruggu-ruggutönn

Myndskeið

Diskurinn Maja Maríuhæna

Mína útgáfu af Ruggutönn er að finna á litla leikskóla-geisladisknum Maja Maríuhæna og önnur barnalög sem ég gerði með aðstoð Sigtryggs Baldurssonar árið 2007. Þar sem geisladiskar eru að detta úr notkun hef ég gert lögin aðgengileg bæði hér á síðunni Maja Maríuhæna og önnur barnalög og á tónlistarveitunni Spotify.